勝八居酒屋 (已結業)

開左幾晚ot，今晚食餐好，今晚同事就介紹我去永光嘅勝八，佢話呢度d 日菜煮法幾特別，所以今日就上嚟試下啦。入到嚟，地方唔係好大，不過都幾Cozy，有少懷舊日系feel。叫咗個特色刺身，黑松露真鯛，本身真鯛魚肉比較爽口，加埋黑松露油感覺變得好厚，好香。帶子係用上活帶子，所以睇落特別晶瑩而食落比起急凍嘅更加爽口。真蠔就比較creamy啲，不過加咗酸汁。食起上嚟就啱啱好，酸汁仲將真蠔嘅鮮味增加唔少。之後就叫咗燒飯團，飯團燒到起晒飯焦，咬落脆卜卜，仲有唔同口味，我就比較鍾意食明太子，辣辣地好野味。松葉蟹天婦羅，原條蟹腳上陣，一啖食落去脆脆嘅天婦羅加埋鮮甜嘅蟹肉，真係好滋味。而配菜我就覺得天婦羅金菇都係佳作，食落一啲都唔油。好似食緊金菇味薯條一樣。黑豚肉炒日本涼瓜，涼瓜非常甘香，(明顯廚師有特別處理)加埋豚肉雞蛋一齊煮，竟然有一種家常嘅感覺好窩心。最後就叫埋個大蜆麵豉湯，隻蜆好大隻煮到啱啱好，好滑。因為蜆好新鮮，令到濃味嘅麵豉湯加咗一份甜味。最後食埋個豆腐雪糕，估唔到豆乳味咁濃郁。大家記得食埋呢個先好走!