一鮮刺身壽司 (已結業)

作為呢一年來我收工嘅必經之路，呢間一鮮一直無留意到，多得佢呢個兩週年酬賓嘅手寫牌，終於吸引我第一次入去試吓，果晚七點幾，入到去，裝修以木為主，座位以bar台bar凳形式，面積唔大，但係幾有居酒屋嘅氣氛!第二朝唔使返工，梗係要開一支sake飲下啦，價錢由98-158，都算合理。師傅話時不時會入一批唔同牌子嘅清酒，果晚凍凍地，老細好細心，我地未問佢，佢就主動問我地使唔使整熱支sake,呢支叫奧之松$98，興熱左酒香唔錯，味道唔算辣口，配合埋炸蠔送酒，胃口開晒！個炸蠔$32蚊有五粒，全部即炸，蠔味好夠，呢個價錢計超值，之後我同老婆散叫左十件壽司同埋吞拿魚腩碎反卷。啲飯口感好好，夾起唔會散，啲魚生食得出係新鮮嘅，三文魚，帶子，魷魚，甜蝦都好正！北寄貝就普通啲。最後我哋要咗個鰻魚飯，鰻魚份量適中，咬落口感唔錯，鰻魚汁份量啱啱好，唔會搞到個飯太鹹$58仲送野飲，晚市嚟講算係咁啦！埋單$292有時間會再幫襯！P.S.下次要試吓加拿大海膽，隔離位個兩公婆係咁話好甜