乜嘜雞蛋仔

營業中

休息中

屋企附近嘅小商場前排轉手加大翻新，除咗引入幾間連鎖快餐店之外，仲有呢間小食店，放工見到有唔少人等外賣，好奇之下我都加入趁下墟。小食店原來同旁邊嘅清玉相連，一邊賣小食一邊賣飲品，雙劍合璧。除咗香噴噴嘅雞蛋仔同格仔餅之外，仲有燒賣、魚蛋、腸粉同撈麵等港式小食，價錢合理。竹炭雞蛋仔概念新鮮，夾心加入帶有鹹味嘅芝士粒，蛋味亦算香濃，但如果外皮可以香脆啲就更好。抹茶格仔餅加入紅豆、練奶同花生醬，紅豆保留少少口感，格仔餅外皮微脆，內裡香軟，咬落透住淡淡嘅抹茶味同蛋香，成個配搭非常夾，絕對唔能夠錯過。腸粉餐有五條腸粉配燒賣同魚蛋各三粒，份量唔少，相當抵食。熱辣辣嘅腸粉夠哂滑嫩，伴上大量甜醬、麻醬同白芝麻，係久違嘅滋味。咖哩魚蛋亦同樣抵食，口感彈牙，配上香辣嘅醬汁非常惹味，屋企人都大讚。牛肉燒賣比起平日食到嘅結實些少，牛肉味濃，但同其他幾款小食比較就冇咁出色。難得小商場亦吸引到優質小店進駐，小食質素唔錯，而且價錢合理，難怪人氣咁旺，相信自己亦會成為常客，希望小店保持水準，造福街坊。