Seafood Stand (已結業)

今晚同朋友去樂富試吓呢一間Seafood Stand，一入到去覺得餐廳設計別致，好似去咗外國咁。細細間餐廳，座無虛席，只有兩個服務員，但係服務態度非常好。我同朋友叫咗個牛魔王漢堡，好足料，另外轉套餐，加咗個芝士條同埋餐湯，個餐湯係粟米湯，超好味，值得推介。我哋再叫咗個10安士特級安格斯肉眼扒配薯菜，呢一個套餐就跟三文魚手指同埋橙汁。個肉眼扒煮得恰到好處，啲肥膏入口即溶，超正。我哋另外再叫咗個炸魚薯條，同埋田園沙律一齊食。我哋都好耐冇食過炸魚薯條，好懷念。我覺得Seafood Stand係一個同朋友聚會嘅好地方，暢所欲言，過好開心嘅一晚。