歐意餐廳 (已結業)

年初三行大運，行到嚟上水，見有啲餓就去屋邨商場搵間非連鎖嘅茶餐廳醫肚。舖面幾闊落，目測有40個座位以上。下午茶餐牌都有幾多選擇，價錢相宜。原本揀咗滋味沙律系列，點知侍應話冇供應，就揀咗酸瓜沙律吞拿魚牛角酥配薯角$28、芝士滑蛋蕃茄生菜牛角酥配薯角$28、沙嗲牛肉蕃茄濃湯通粉$31、脆脆奶油豬$19、香草雞扒濃湯意粉$29，全部跟餐有熱飲，凍飲加$3。檸檬水每杯都俾咗5、6片檸檬，好誇張。牛角酥個樣唔多似牛角酥，個包唔熱嘅，食落都算鬆軟，吞拿魚太多沙律醬，得好少吞拿魚，相對地滑蛋芝士牛角酥好食啲。薯角即炸好味！雞扒濃湯公仔麵只有一塊好細嘅雞扒，味道還可以。最欣賞係佢個沙嗲肥牛蕃茄濃湯通粉，本身以為沙嗲同蕃茄嘅味道好似會溝唔埋，點知食落味道幾好，仲好足料有好多沙嗲牛肉。脆脆奶油豬都算香脆嘅，奶油略嫌少咗啲。