太平洋咖啡 (已結業)

近期經過Pacific Coffee，見到佢有張橫額廣告，推消新出嘅甜品。今趟晌機緣之下，有幸一試！所以晌度同大家分享兩款好味甜品：層層疊香蕉杯 (Banana Toffee Trifle)、意大利芝士餅 (Tiramisu)。層層疊香蕉杯：下層係香蕉肉加拖肥醬，中層係脆脆粒粒，上層就係一抹幼滑忌廉同朱古力碎。拖肥不嬲都被人覺得係超甜嘅嘢，但依個香蕉杯嘅拖肥甜度就大幅降低咗，食落仍然有重重嘅拖肥香，但就無咁「漏」；加埋熟透嘅香蕉肉，凈係下層已經好啱食。脆脆嘅「卡擦」口感，配埋幼滑忌廉，釣住少少拖肥醬一齊食，又OK喎，咁樣食就唔會覺得D忌廉好肥，釣住少少拖肥醬又令D脆脆多咗層甜香！果然有驚呀！意大利芝士餅：常見嘅甜品之一，但有別平時見到一件件嘅芝士餅，而用小杯裝，原來係因為當中做嘅芝士餡做得好幼滑，相對就變得比較「瀉身」，要改用杯裝，唔可以做成餅狀，不過，無論芝士餡，定抑或浸咗咖啡酒嘅手指餅，味道一樣咁正！