象泰 (已結業)

今日咁啱嚟到屯門，見到呢個商場有一個類似Food Court既地方，不過呢間泰國餐廳就最吸引，望到入面好多客人，而且位置都幾舒服，咁就入去試吓啦。一開始我哋就叫咗個生蝦，估唔到佢嘅賣相咁靚啊。將逐隻生蝦放入shooter杯度，唔單止好睇，而且生蝦仲索哂啲辣汁，大大隻嘅生蝦真係好好味。呢個海南雞飯真係極度推介，啲雞無骨，而且又嫩又滑，唔使點汁都好好味。而佢個飯就係黃油飯，夠晒濃味，親埋海南雞食真係一流。食泰國嘢梗係要飲泰象啤啦，佢即場開咗支泰象啤，係我地面前倒入呢個泰象度，真係好有風味啊。呢個牛仔骨都非常值得一試，記得價錢唔貴，但係勁多舊牛仔骨，而且烹調時間啱啱好，個牛肉唔會太硬亦都唔會太稔，夠晒惹味最啱送飯啦。朋友叫咗呢杯芒果特飲，佢話仲好味過許留山，我試咗一啖，的確好重芒果味，但係又唔會太甜，消暑一流呀。呢間餐廳價錢唔貴，嘢食又高質，雖然屯門唔近我，但有機會一定會再嚟食呀。