鬍鬚仔 (已結業)

食過灣仔個間，啲粗薯條好好食，想再食就去左屯門個間。去到見到好多人，堂食既話要等位，所以就買左外賣返屋企食，點知屯門呢間食物質素就麻麻地。我買左個酸菜醬熱狗，跟餐叫左粗薯條跟湯。買個陣撞正小朋友放學時間，廚房都比較忙，叫完之後等左一陣先攞左外賣返屋企。咁我食呢間就係想食佢個粗薯條，點知買完返屋企，攞起左個熱狗之後一睇，見到湯隔離個包係一大包幼薯條來。幼都算啦，仲要勁咸，擺左陣再食簡直覺得啲薯條唔係新鮮整既，食左少少已經食唔落口。個熱狗啲醬係一patpat既，不過我打開左之後冇影到。食落味一般，但係條腸就好長份量好足。