象泰宴

營業中

休息中

有朋自遠方來，親朋久未品嘗泰菜，於是就近挑選了象泰宴為親友掃塵。小店裝修簡單，企理整潔，不經意的洋溢著一股泰國風情。一行6人先點了一個4人套餐再加幾道招牌菜式，餸菜未至，親友已經等到急不及待，一副餓鬼的樣子。先上菜的是串燒沙嗲和無骨海南雞，串燒有雞和豬兩款，每串都份量十足，配上沙嗲醬食，十分惹味。海南雞皮爽肉嫩，啖啖肉，半隻都6個人分享。馬拉盞椰菜苗味道微辣咸香，可惜椰菜不是苗，比較老，換來有咬口。泰式肉碎生菜包肉碎唔會炒得太乾，依然有肉汁，包上生菜，剛好中和油膩感。冬蔭功海鮮湯味道小辣帶酸味，相當開胃，湯底有好多蝦頭，足見用料十足。泰式經典明爐烏頭熱辣辣上枱，味道唔算太突出，尚算合格。最後係招牌焗黃咖哩麵包軟殼蟹同紅咖哩牛筋腩，再配上香葱蒜蓉包作結。黃咖哩偏甜身微辣，蒜蓉包沾上咖哩係絕配。紅咖哩相對較辣，筋腩份量都足夠，香料味較重。象泰宴菜式份量都好足夠，價錢合宜，味道尚算不錯，普通食飯都係一個唔錯既選擇。