滿越越式河粉專門店 (已結業)

睇見雜誌話好味，又咁岩去左荃灣行街，於是就刻意咁去試下。舖頭位置都算係幾山卡啦，唔算太近地鐵站，亦唔在好多野食果條街。不過我會再去試多次，因為好味。雜誌介紹生牛肉湯河，仲話一日賣出百幾碗，認真誇張。我同朋友一人一碗，佢要生牛肉湯河，我就要左招牌湯河，兩碗河粉味都差唔多，不過招牌湯河配料的款式較多。湯河都算幾幼滑，彈牙就不至於，但由於湯底的味道很好，每口粉連同湯一起吃下的話效果會很好。至於配料，招牌湯河有3款配料，札肉、雞絲、牛肉，札肉幾甜，雞絲不夠幼，如果可以撕得更幼效果會更好，因為沉在湯底可以吸收到湯的味，最後生牛肉也很新鮮，下次我會食生牛肉湯河就算，食過之後我真係信佢一日賣百幾碗生牛肉出街，因為真係覺得好好味。飲品要左杯青檸梳打，幾好飲唔算太甜亦不會太淡，加左一片香草在飲品內不過我估只是裝飾，並沒有什麼用的。我坐的位置剛好可以偷看廚房，常說眼不見為乾淨，但我眼見這舖頭的廚房相當清潔，廚師的服裝也十分清潔白淨，這是意料不到的。