山旮旯 (已結業)

幾乎每人食完山旮旯都讚不絕口，終於到我一試，經app訂位部分食物仲有折。雖然佢個位真係有啲山旮旯，但朋友同我都覺得值得再訪，下次要試埋啲手工啤。馬拉蜆熱鍋配蒜蓉包：未食過馬拉蜆嘅我地以為啲蜆係鼓椒炒蜆嘅size，點知成隻青口咁大，啖啖肉，可惜煮老左少少有啲韌。個汁白酒同牛油味都好岀，蒜蓉包係白家製，喺法包搽上新鮮蒜茸再焗，又脆又香，撈埋汁一流！黑椒蜜糖薯仔和牛粒：鑊仔牛粒真係點整都好食，和牛粒同薯仔嘅份量約1:1，和牛粒好淋，唔算好有肉味，但每粒都裹滿少少辣嘅黑椒蜜糖汁，好快就清哂成碟，如果薯粒有焦邊就仲正。紫薯鮮奶：見到隻紫色咁夢幻好驚啲味好假，點知又幾天然，雖然奶嘅比例多左啲但都幾好飲。