得龍大飯店 (已搬遷) 新店位置

得龍呢個招牌聽過好多次了。主要係話佢啲懷舊菜做得好，例如金錢雞同埋焗魚腸。我哋呢一代已經好少食呢啲菜式，亦都唔會局限於廣東菜，所以一直都無試過得龍。最近常用嘅外賣app有得龍嘅山楂咕嚕肉飯盒，$55連送貨。既然呢頭啲似樣茶記都差唔多要呢個價，加上媒體最近不斷話得龍老細就嚟收山，即管去馬。10點半落單，12點半攞到返嚟仲係熱辣辣，呢方面的物流真係做得幾好。白飯同餸菜各佔一半，互不侵犯，唔會浸到啲飯淋晒。白飯算係唔錯，比連鎖集團的質感好。得龍嘅咕嚕肉聲稱用山楂炮製。我食得出佢比起一般咕嚕肉多咗一陣柔和嘅甜味，唔會覺得啲汁太酸。而且佢哋啲梅頭肉質素唔錯，唔會大大舊肥肉，啖啖都有好肉食。呢味餸的確係做到大酒樓級數，份量亦唔少，午市賣呢個價我覺得物有所值。