成都小巷米線雞煲 (和富道) (已結業)

自從喺呢頭返工之後，就開始發掘附近嘅餐廳，今日行吓行吓就嚟到喺和富嘅呢間成都小巷。麻辣米線可以話係川味車仔麵，可以任揀幾款配菜，我哋就揀咗麻辣腩肉、豬膶同黃金角，再加$3轉水晶紅薯粉，嗰陣四川風味真係好正。另外仲揀咗水煮牛肉配米線，唔食得辣又鍾意食辣嘅我就揀咗BB辣，不過我都覺得相當夠辣味。水煮牛肉份量都夠多。米線係另上，清湯嘅米線配合微辣嘅水煮牛肉真係非常之夾。韭菜煎餃子係即叫即炸，餡料脹卜卜，又夠香脆。呢度有幾款唔同口味嘅手撕雞，我哋就揀咗唔辣嘅薑蔥手撕雞，佢嘅醬汁好正，配埋我最鍾意嘅芫荽真係冇得彈。孜然烤中翼都好夠肥美，味道都唔錯。涼拌土豆絲條條都咁爽脆，少少辣令人非常開胃。另外佢嘅飲品都好抵，我哋分別揀咗凍奶茶(+$6)同埋紅豆冰(+$10)，配合辣辣嘅美食，真係冇得彈。