What The Food Cafe (已結業)

夜晚同老婆去睇戲，諗住睇之前食個早Dinner，上網搵到呢間cafe既鰻魚蛋包飯唔少人話好食。門前面條走廊已經好有特色，有唔少卡通公仔喺牆上面。新鮮麥包，個包仲熱辣辣，好軟熟。羅宋湯，唔會稀框框咁，味道好香好濃，而且辣辣地幾好飲。黑色狂牛，以前飲開黑牛都係可樂加朱古力雪糕，但呢杯狂牛就加埋咖啡做底，飲落都唔錯。WTF水果茶，個果汁底唔係好甜幾好飲，仲有唔少果肉，上面加左啲花聞落好清新。軟殼蟹Pizza，餅底好薄，邊脆內軟，而軟殼蟹炸到好香，少少腍好易咬。蒲燒鰻魚蛋包飯，黎既主要目的就係想食呢個飯。鰻魚唔算大塊，但啲肉就幾厚，而且用埋鰻魚汁燒更加香。滑蛋唔係全熟所以好嫩滑，好濃既蛋香味。而飯就係珍珠米用鰻魚汁炒，所以入味。