華香雞 (已結業)

觀塘有好多工廈食堂，菜式美味又價錢便宜，而且仲好有懷舊氣氛添，華香雞就係好例子。雖然係舊式工廈，但餐廳室內十分光猛，而且地方寬敞舒適，裝修很有80年代香港情懷。幾驚喜原來仲用平板電腦點餐添！呢度招牌菜係雞，淨係雞都有唔少選擇，梗係要試吓。我哋選擇咗黃酒鮮雞，欖角白鱔，同甜梅菜菜心，另加白飯同黃薑飯。黃酒鮮雞（$50）配黃薑飯（$3）冇醉雞嗰種苦味，但係充滿酒香，適合啲唔鍾意酒苦嘅朋友。黃薑飯一粒粒黃色，食落有薑味，好特別。欖角白鱔（$65）配白飯，味道鮮甜，欖角魚汁微酸開胃， 十分適合送飯。甜梅菜菜心（$58）鮮嫩，入口無渣，配上甜梅菜，很有家庭菜的感覺。所有餸菜都用木盆奉上，賣相精緻，分量大件夾抵食，叫左三個餸可以夠三個人食。原本食完飯想叫甜品，可惜全部售罄，侍應特意送上兩碗例湯，係蕃茄薯仔湯，好香濃。