FAB Kitchen (已結業)

荔枝角工廠大廈隱藏左一間私房菜西餐廳，有闊落座位，精緻嘅西餐，叫左2個 3 courses set dinner $358. 可以試到6道菜。巴拿馬芝士薄片配薯蓉湯，滑溜忌廉薯蓉湯，加上烤過嘅芝士薄片，配搭好夾，係一個溫和幼滑嘅開始。牛油粟米泡沫配加拿大海膽，牛奶泡沫之中加入爆谷，配上加拿大海膽，爆谷香味配上海膽鮮味，係味覺新衝擊。意式雞肉卷配花雕汁，雞肉夠滑，帶花雕香味，係中西fusion 嘅成果。泰式軟殼蟹配牛油果，另一款fusion 菜式，軟殼蟹香脆，牛油果混入蕃茄肉同芒果汁，口味清新幼滑。牛油南瓜白菌素食忌廉芝士卷，千層麵卷入忌廉菠菜，加上忌廉蕃茄汁芝士烤焗，口感幼滑，配上牛油南瓜，鍾意食千層麵嘅話一定要試試。西班牙豬柳配迷迭香，意大利芝士醬，紫酸菜，豬柳嘅豬味好香，肉質嫩滑，配芝士醬令口感更加幼滑，配德國式嘅紫酸菜，可以開胃減少油膩感。餐飲可以揀咖啡或者英式茶包，食飽可以慢慢飲杯英式茶，最適宜做朋友放工聚腳點。