魔膳廚房 (已結業)

之前經朋友介紹觀塘工廠區美食-魔膳廚房，令人回味無窮，所以今日再帶另一位朋友去試下，果然繼續保持一貫水準。上次無試過沙律吧🥗，今次就試下啦，$38一位任食，有沙律、螺肉、青/黃椒、蕃茄🍅、西瓜🍉、啫喱...我哋叫左2兩個set，一個香煎帶子黑松露意大利飯🍴，另一款係德國烤原隻豬手配薯角。跟餐有餐湯，我哋揀咗一個羅宋湯，一個忌廉湯。羅宋湯夠晒濃味，蕃茄味好突出，雜菜豐富；而忌廉湯夠濃稠，亦都有好多雜菜。最欣賞嘅莫過於係個餐包，真係好好味，又鬆又軟。香煎帶子黑松露意大利飯有兩大隻帶子，面頭有芝士粉同埋脆脆，意大利飯有好香嘅黑松露味，味道濃郁，飯夠晒creamy。德國烤原隻豬手配薯角：豬手表皮烤到脆卜卜，肉質都好嫩滑，配埋少少酸菜，中和肥膩感，配菜薯角做得一啲都唔普通，非常香脆，充滿薯香味。跟餐仲可以揀兩杯飲品，揀咗熱蜜桃紅茶，如果想轉凍飲加多$5，叫咗杯青蘋果梳打，青蘋果味都好香，唔會太甜。食完飯，沿路落去仲有好多圖畫欣賞，成個藝術廊咁。