陳財記

營業中

休息中

一行二十幾個人食飯，提前1星期訂座。話俾間房我地但有5000蚊低消，已經明確回覆左餐廳，我地唔係要房有位坐就可以，5000蚊低消我地唔接受，但當日依然俾左房我地坐。坐低叫人真係叫天不應叫地不靈，個個吖姐態度都好唔耐煩。由於有老人家我地想要一壺暖水俾佢地飲，直到餐飯食完都冇黎過。我地叫左20幾罐飲品加20枝啤酒都即到，叫壺免費水就唔理人。落單個陣一直不斷sale特色菜，我地其實已經打過電話留海鮮，都拒絕左好多佢地sale既菜，最終只係加左2條魚同2碟辣酒花螺。上菜速度慢，又唔係特別好食，小朋友要食既蒸水蛋等左成個鐘頭先到。埋單個陣我地先知2碟辣酒花螺加埋要成600蚊，我地問吖姐點解咁貴，佢話1例148蚊 (半斤) 我地每碟辣酒花螺係1斤，所以600蚊。我地問點解會變左每碟1斤？落單個陣我地只係話要2碟，佢地就擅自幫我地落斤數，而且落單完全冇同我地講過。吖姐仲口口聲聲話我地落單個位小姐知道，但1枱10幾個人都冇聽到過佢有講。埋單差唔多成6000蚊，完全唔知自己食左啲乜野，服務態度同職業操守特別差。以前食過幾次都冇咁既情況，一見人多就劏你，唔會再有下次。