阿里朗韓國餐廳 (已結業)

星期六下午入到嚟，唔駛等位，但座低一望，同平時去開嘅韓國餐館唔同，發覺座上客好多西方人士，反而狀似韓國人嘅不多。三個人，分別叫咗兩個湯麵同一個牛肋骨湯，另外重叫咗個炆豬腩肉辣生菜包。先上咗六七款前菜，不外係kimchee、甜薯、豆腐等大路嘢，一般。我叫咗嘅辣海鮮湯麵到，上面有好多蔬菜，但海鮮好少，只得一"隻"唔完整嘅青口，三隻細細隻嘅蝦、一d魷魚"碎"同一d 疑似獅子狗魚旦嘅幼條。夾起麵一望，太座已經話咁似辛拉麵，飲一啖湯，果然有濃厚嘅辛拉麵湯包味，麵身煮得比較淋，唔係好啱自己口味；而太太叫嘅牛肋骨湯据佢講亦只係麻麻。開始有d失望。好彩個豬腩肉生菜包挽回一d分數，豬肉加埋辣嘅醃菜，點d醬，包係生菜嚟食，味道口感俱佳。其中最正係醃咗嘅生蒜，又辣又脆，好食。呢處食品水準只算係一般，但以價位嚟講，完全唔可算係物有所值。如果唔係個生菜包，我毫不猶豫會俾喊面。但亦相信唔會再嚟。