魚米家魚湯米線 (已結業)

考AL Geog，即係最後一科既lunch。考完SQ，手部做足運動，肚子打鼓，行去君薈坊睇下有咩好食。見到有間米線，正合我心意，就入左去食個lunch啦。入去座位係自己選既，因為根本冇人serve。睇兩睇就叫左香茅雞翼米線，有個小食送，要左燒墨魚丸，飲凍奶茶。十分鐘唔洗就黎碗米線啦，見冇筷子，就問阿姐拎對筷子啦。點知有個較高級既侍應(個頭gel到好行既二十歲左右既年青人)，急步行過黎，拉開枱邊既一個櫃桶，轉身走左去。咁我第一次食點知果度有個櫃桶呀，洗唔洗咁既態度…講返碗米線，奶白色既魚湯冇咩魚味，有清甜味但喝完口渴。香茅雞翼亦冇香茅味，好似普通炸雞翼。墨魚丸就彈牙，有墨魚味，幾好。奶茶就普通質素。食食下，我見到個年青侍應話:「大陸人呀，我都唔知佢講乜野」（夾雜粗口），叫個阿姐去幫內地客落單。唉…今時今日咁既服務態度，點得呀。