喇沙大少 (已結業)

第一次寫食評，就要寫負評...首先講下嘢食，叫咗個海南雞飯，雜菜喇沙同埋細肉骨茶（無相，完全無意欲拍）肉骨茶，偏甜、中藥味淡；喇沙，麵腍、湯味淡，份量還好；最後海南雞，重點想食，但真係一上枱已經覺得中伏，雞胸加送雞翼，雞胸唔緊要，不過望落又乾又鞋，食落味道無特別，得個鞋字；飯夠味，不過又係乾爭爭；湯同菜同醬...算啦。呢個飯賣$72加一，尖沙咀新港中心food court只賣$50但好味過佢多多聲囉。嘢食一般，服務都好有問題。我唔知間舖收幾點，我諗我大概9點4左右入到去，無耐就last order，問完我地有無嘢加就俾單我地，我明白大家都想早收工，但啱啱先上齊嘢仲食緊就俾單，駛唔駛咁急？到埋單，簽完單，佢地放低張咭同單就走咗去，一句多謝都無。唔係話幫襯你就要講多謝，只係嘢食唔掂，又無服務（上菜時無諗過幫你移一移入少少啲野，可以就咁放低係枱邊就走咗去），仲要收加一，俾得好唔据啫。最後我完全食唔落，坐多陣走咗，大概十點，未關門。呢餐雖然唔貴，但有時覺得香港人都幾慘，俾二百蚊食餐飯仲要同自己講算啦...又唔貴。