A la maison XXL Seafood & Grill (已結業)

星期六日搵地方去想東行下，西行下，去啲平時冇去多個地方見識一下香港都好，唔好成日喺屋企。今日呢就行到過去炮台山附近，喺橫行發現到呢間西餐，上網再睇一睇啲評語都唔錯，所以就試吓。放假我就最鍾意食All day breakfast，呢到同出面嗰啲唔同，呢個係高級版嘅。高級在邊度呢？就係見佢有隻龍蝦。整個嘅質素真係幾好，除咗有半隻龍蝦之外仲會有煙三文魚，配菜仲有啲雜菌同埋薯仔，其他雞蛋，腸仔新唔使講。亮點就係佢嗰兩塊麵包，唔好諗住望落去係乾爭爭嘅麵包，原來係好軟身的甜多士，外有小脆，內軟。食落去有好足夠嘅牛油香味，係我最鍾意嘅類型。我再叫左個卡邦尼亞意粉，個意粉係我食過之中都係頭三名好食嘅，雖然我唔知佢用咗啲乜嘢芝士，但係煮出嚟嗰種芝士味出面好少食到，好濃，好傑。就算我係出面食過，用原個芝士即場撈同呢一度都係差唔多，比較值得試。甜品有4至5款，我就選左呢一個焦糖布丁，食嘅時候暖暖地，似軟身啫喱糖，食落去蛋味淡淡嘅，甜味就適中。今日發掘呢個地方幾好，估唔到食物嘅嘢有返咁上下嘅質素，價錢來講我就覺得算中等，值得去。