樂天經典 (奧海城二期)

營業中

休息中

今晚同媽媽撐枱腳，係奧海城行完街就順便搵間餐廳食晚飯。其實三期個邊餐廳有好多選擇，不過媽媽鍾意食中菜，又想近返地鐵站，就揀咗來樂天食飯。餐廳裝修低調企理，座位之間好多空位，感覺開揚舒服。坐低之後我哋就開始研究餐牌，發現呢度啲中菜同平時嘅酒樓有啲唔一樣，除咗有啲新潮嘅菜式之外，仲有啲南洋風味。而且呢度嘅食物可以叫大中細size，多人少人黎食都冇問題。由於選擇好多，我哋都睇左好耐先決定到食乜嘢！先來一個頭盤，蒜香紅海蜇頭。海蜇頭非常爽脆，味道酸酸辣辣，醒神開胃。然後，見餐牌上面有一味招牌扣肉包，我哋就點左兩件試吓。原來包同肉係分開上嘅，自己夾埋一齊。其實咁樣仲好，扣肉嘅汁唔會整到個包濕哂。呢味果然係招牌菜，包係非常嘅鬆軟，而扣肉亦炆得好腍好入味，最正嘅係餐廳安排左生菜夾入個包一齊食，感覺健康啲，又冇咁油膩。再來一味古早魚香老鼠粉煲，呢個煲一拎上枱嘅時候味道已經好香，侍應仲拎住一碟小小嘅鹹魚碎，問我地要唔要撈埋落去，媽媽鍾意鹹魚，即刻表示同意。撈左鹹魚肉，再搞下隻蛋就食得。老鼠粉其實就係銀針粉，口感滑溜，配上杰身嘅湯汁，同埋各樣配料（咸魚、蝦仁、冬菇、蔬菜等等），味道豐富好食，媽媽讚不絕口。