南小館 (已結業)

作為「小南國」旗下走年輕路線既品牌「南小館」，一入到去已經感受到果種清新既味道。裝修非常光猛企理，以白色主打為主，令人不其然感受到充滿活力既感覺！是日的公眾假期雖然係星期五，但居然都有供應平時閒日既$180 lunch set，前菜、點心/麵、飯/年糕同埋蔬菜每樣一款，重要免茶免加一添，真係抵到爛！四小碟叫左冰宮肴肉、花雕白雞、糖醋排骨同埋四喜烤麩。整體方面感覺都尚算唔錯，肴肉做得幾入味之餘又唔會太鹹同太肥，排骨同烤麩juicy之餘亦都不失本身應有既味道，抵讚！唯一要批評既係D花雕雞骨多過肉，份量好似少左D唔多夠喉！老重慶擔擔麵同坊間食到一般既擔擔麵差唔多，只係麵身略為腍左少少，不過尚可接受。唔知係咪冇叫到「少辣」既緣故，辣度比一般既「普通辣」重手好多，如果唔食得辣既人要記住叫「小辣」呀！大良炒飯方面，份量都叫做合理，唔好睇佢好似好細，將D飯攤開之後都可以舖滿成個碟面架！不過炒飯就略為油左D同鹹左少少，蝦仁亦都淡口左少少令味道差咁D，不過都可以接受。清炒菜心呢都係D基本野，冇乜難度可言，同一般中式酒樓食肆甚至茶餐廳食到既差唔多，不過因為用左蒜蓉炒，所以一食就食得出「鑊氣十足」既感覺，正