新越越式料理 (已搬遷) 新店位置

係九展睇完戲行行下肚餓，見到呢間越南野幾吸引就入左去試下。餐廳食身貴精不貴多，主打湯粉、海南雞等等，睇落都幾正宗。廚房為開放式，裝潢都幾光猛。食物方面叫左火車頭湯河、香茅豬排撈檬同牛油雞翼。火車頭份量十足，好大碗，配料充足，有生牛肉、牛丸、牛筋腩、牛柏葉，亦有小小炸乾蔥吊吊味，牛肉湯底好清甜，食完不會口渴，應該無落味精淆際，而且份量好多，2個人share都無問題。豬排撈檬酸酸甜甜，有生菜絲花生碎加添口感，炭烤豬排燒得好香脆，香茅味亦好出。牛油雞翼炸得好脆，有淡淡牛油味，可惜肉就無咩味，醃得唔夠入味最後仲叫左珍多冰及青檸梳打，珍多冰椰汁好濃推介！整體黎講食物性價比不錯，湯粉比較出色