農民泰菜 (已結業)

平日都好常去好運中心果頭食野，但平日都淨係見到海皇粥店、吉野家之類既食店，估唔到行入商場小小，就有間野食泰國菜，價錢好親民，選擇又幾多，仲要唔洗等位，就好快坐低左。餐廳格局都幾特別，有d似快餐店既形式，自己坐低，買飛之後就去出餐位拎食物。環境方面就真係幾光猛同埋闊落，唔洗好似其他快餐店咁咁逼，可以同朋友舒舒服服咁坐住食野傾計。雖然話係泰國菜啦，但都有唔少其他菜式選擇，港式炒飯麵、鹵蛋豬手、火鍋都有得揀，同朋友可以各自嗌想食既野。青咖哩豬頸肉飯，片片豬頸肉薄切得黎燒得幾到位，肉質幾瘦，青咖哩醬稀稀地，幾重椰奶味，撈埋飯食幾開胃。海南雞幾嫩滑同埋都足料。龍眼冰就淡淡地，但岩岩好可以中和同比較濃味既冬陰功同咖哩，龍眼肉亦夠多。