順景茶餐廳 (已結業)

幾年來成日經過，但無食過，上星期終於入去，幫襯下午茶餐。門面舊，裡面都舊，可幸地板枱櫈食具同調味樽罐都乾乾淨淨。煎豬扒米連奶茶，15蚊。等咗一陣，先來奶茶，喝一口，雖無驚喜，但茶味奶味口感都OK；再等一陣，湯米到，豬扒剛煎起熱辣辣還在冒泡，已切好，無伴菜，湯底無咩色同味精但居然夠味。食完埋單走人。喺街行行吓發覺唔見嘢，沿來路揾，推門入番呢間鋪，老闆娘即刻問，知道我唔見嘢，即刻同坐喺位個客講唔好意思，仲蹲下來幫手揾，揾咗一輪都揾唔到，就同我講如果見到就同我留喺收銀度。好好人。噚日午市再嚟，叫焗芝士肉醬意粉，熱檸水。港式整法其實無咩期望，不過呢度勝在即叫即焗，又冇話連「淥」意粉d水都上埋碟俾埋你。出乎意料o既居然係檸檬好新鮮。一切都好似好平凡。只係覺得食肆做到乾淨企理其實唔係簡單。