佳記美食 (上海街)

營業中

休息中

呢日去完廖孖記買腐乳，就嚟到呢間平食兩餸飯店醫肚，兩餸一飯，分別係南乳豬手及椒鹽豬扒$33再加$2熱飲奶茶，一共$35，起呢區算係平價，但抵唔抵食又係另一個問題。豬手一睇啲骨切得咁整齊就知係雪貨，當然，咁嘅價錢，唔通會畀鮮貨你食咩？品質係大路貨，即係腍得嚟有啲爽，而唔係我喜歡嘅腍滑嗰種，而且要燜到腍滑嘅話，長期保存亦係一個難題，所以收貨。椒鹽豬扒就係失望，失望嘅唔係因為佢唔脆唔夠熱，老實講，呢啲煮定一大盤嘢，預咗佢放咗好耐，所以可以接受。失望嘅係佢連我呢個食得好小辣嘅人，都完全食唔到辣，呢個餸係要夠脆，少少鹹，少少辣先至叫好食，否則真係唔煮好過煮，唔食好過食。更差嘅係碗飯，爛到好似畀老人院嘅長者食咁，完全唔掂，我為免浪費食物，最終食埋佢。最正常算係杯奶茶，但佢啲糖係散裝砂糖，而唔係依定慣常嘅包裝糖，要用匙羹𢳂起落杯茶度，自從習慣咗用包裝糖之後，就覺得呢啲散裝糖唔衞生。$35，兩餸一飯加熱飲，價錢係平，但我寧願畀多幾蚊甚至10幾廿蚊去食啲質素好啲嘅，所以呢餐會係我幫襯嘅第一餐亦係最後一餐，除非我失憶。