水蜜桃冰室 (已結業)

港式鐵板餐真係好耐未食過，以前只有考頭十名，M媽先會帶我去冰室或茶餐廳据扒，隨住人越嚟越大，食嘅嘢越嚟越多，好似都有好耐無食過鐵板餐喇，難得今日A姐要開OT，獨留我自己一個人食飯，一於去旺角嘅水蜜桃冰室据扒啦。蒜香雞翼雞翼炸得好香脆，脆卜卜而且大大隻，蒜味濃郁！鐵板紐西蘭牛柳呢度嘅鐵板餐會先將酒淋上炙熱嘅鐵板上，再點火！嘩！好誇張呀！但就係咁而令肉質加添焦香味，5成熟就啱啱好。之後淋上黑椒汁，聽到鐵板上嘅滋滋聲就最幸福啦。鐵板上有3大塊牛柳，肉質尚算不錯，真係好抵食。芒果雪葩芒果好鮮甜，濃縮嘅果肉運入雪葩之內，好好味！食冰室又點可以唔飲港式飲品？今日就飲咸檸七啦。