你妳 (運通洋樓) (已結業)

平時出街食飯食得多都使唔少錢，但又覺得難得出嚟同朋友見面，都唔想食得太hea，於是朋友就介紹咗我去「你妳」。入到去鋪頭唔大，不過座位都夠寛坐的舒服。魯肉飯賣相雖然平凡，不過滷肉好香入味，最緊要係夠撈飯，兩個人share食都綽綽有餘所以俾個盒呃咗。便當仲會奉送一個湯，就揀咗花枝丸湯，夠彈牙，湯味濃郁，合格！芝士玉米蛋餅都好食，有拉絲效果之餘，加埋爽口粟米粒粒，大大啖咬落去香口好味！朋友一坐低就話台灣香腸一定要食，咁當然都叫咗～其實我本身對臺灣香腸興趣唔大，因為覺得好似臘腸又硬又乾，今次一食真係改變咗我睇法，腸仔有咬口，點埋蒜蓉好惹味！小食拼盤都好豐富，有鹽酥雞，炸蝦捲，炸四季豆同甜不辣，滿足晒我哋兩個咁嘅願望，鹽酥雞夠嫩唔柴口，蝦捲都爽口彈牙，四季豆炸過夠香口,份量嚟講整體係唔錯。最後梗係唔少得臺式特飲，我哋叫咗手作紫芋牛奶同芋泥珍珠小芋圓，紫芋奶嘅芋泥夠軟綿，唔太甜，連埋鮮奶飲落奶滑中帶沙沙感，好香好滑。我嗰杯就係芋泥珍珠小芋圓，珍珠同芋圓煮得夠透，有咬牙，加埋芋泥一軟一韌非常特別，芋泥鮮奶都夠滑，好飲！