平成 (已結業)

今日去左尖東K11附近搵野食，見到呢間日式居酒屋，裝潢風格充滿濃厚日本風情，就入去試下。餐牌選擇都幾多，仲有日文翻譯，牆上貼左餐廳推介既菜式實物圖，我哋都參考左，並點左以下食物：明太子雞翼：滿滿既明太子包住雞翼，炸得乾身，外脆內軟，雞肉嫩滑。燒白膳：魚皮燒到脆卜卜，魚肉肥美肉厚，燒到金黃色，串燒絕對係居酒屋既必食之選。 汁燒魷魚筒：魷魚筒原隻上，未食已經覺得好吸引，肉質爽口富彈性，味道鮮甜，灑上蔥花，更惹味。豚肉大阪燒：餡料有椰菜絲、章魚粒，面層就鋪滿紫菜絲、大阪燒醬、沙律醬、國產豚肉，令口感好有層次、好豐富，餅身唔算太厚，唔會覺得膩。小店對食物既用料配搭，一定有經過細心考量和試驗，令我哋可以細味食物本身既原味道，下次一定會再嚟試其他野。