牛陣 (卓爾廣場)

營業中

休息中

因為工作關係，間中都會獨自去卓爾廣場食午餐。咁多間餐廳嚟講，牛陣可以話係性價比最高、最抵食嘅餐廳。呢間牛陣地方唔算大，但我喺平日嘅中午時間嚟過幾次，都唔需要等位。而喺餐廳門口揀套餐時，幾位店員姐姐都超nice，由入座到埋單離開，佢哋都係笑容滿面、非常有禮貌、服務殷勤。食物方便，熟食（有薯格、台灣腸、炸雞等）一般啦，而火鍋食材嘅種類雖然唔多，但品質唔錯，我揀自己鍾意食嘅每樣一件都已經非常飽。仲有，飲品任飲，選擇都幾多，而最重要嘅當然就係Häagen-Dazs雪糕任食，每次有4種口味選擇，而且全部都係啲受歡迎嘅口味，每次都忍唔住要食4、5球先夠。整體嚟講，我覺得平日中午嚟食真係好抵食，推介！