安泰燒臘餐廳

營業中

休息中

今日又去咗安泰餐廳食晚飯,，今日就嗌咗碟豉油雞半隻，小炒王同豆腐班腩煲。 因為嗌咗兩個小菜所以佢都有送埋餐湯，飯同餐前小食。小食日日都唔同，今日就係依個豬手。豬手有少少酸，十分之開胃，食落去仲有微微嘅八角香，真係食唔停呀。佢哋嘅豉油雞都幾大隻，肉質嫩滑，唔會煮得太老，肉有多，咬落去好起勁，簡直係啖啖肉，豉油調味又香，送飯簡直一流。小炒王都落咗幾多料，有韭菜，魷魚，大蝦，小蝦米，銀針魚，腰果等等，鹹鹹地，又香又好味。豆腐班腩煲就中中挺挺，其實同出面嘅餐廳都差唔多，正正常常。價錢嚟講其實都算貴，呢幾碟嘢就要280蚊接近三百蚊。一個月食一餐半餐真係夠喇，咁既價錢我其實寧願出去食一啲特別少少嘅西餐廳，可能都係同一個價。