上海一品香菜館

營業中

休息中

觀塘廣場一向俾人感覺係好平民既地方，多數係路過拮下魚蛋燒賣，又或者入馬會買馬，買下電子嘢等等，好少會食正餐，因為環境真係麻麻甜酸雞球地。呢間小店位於角落，但人龍就排到出門口，我哋一行幾人都無諗過平日夜晚都咁爆咁旺場，只好係門口坐。四個女仔，嗌咗雞絲粉皮， 甜酸雞球，西湖牛肉羹，魚香茄子，加個雞絲炒飯。雞絲粉皮，充滿麻醬既雞絲配上青瓜絲，底下鋪滿粉皮，清涼爽口，作為頭盤非常開胃，麻醬份量適中，而且青瓜絲食得出係即切而唔係整定，爽脆又無出水，食到索索聲。甜酸雞球，可能汁比較多，所以雞球表面既脆粉唔夠脆，不過就好索汁，用嚟撈飯好醒胃。西湖牛肉羹，用切碎嘅芫茜配上牛肉碎同豆腐粒，非常滑溜，莞茜細到咬唔到，但又有香味，豆腐好滑溜，似係布包豆腐，牛肉係米粒size，唔會太大，成件事入口好住家feel，清淡但好味。魚香茄子，亦係多汁既菜式，有少少辣椒同蒜，但咸魚比較少，肉碎比較多，配埋茄子又係好送飯。雞絲炒飯，成餐飯最欣賞既係佢，飯同蛋絲好夾，食到鑊香味，雞絲有少少咸香，飯夠乾身，粒粒分明。成餐飯四個人，三百零蚊，非常抵食。