炻板燒 (已搬遷) 新店位置

今日嚟到屯門呢間炻板燒，位置就喺屯門嘅巴倫紐戲院隔離！十分之近西鐵站！餐廳本身就主打食日本嘢，最出名嘅應該就係板燒牛肉，佢本身有四款主打牛肉嘅，有吉列牛、封門柳牛小排同埋日本和牛揀。因為餐廳而家做緊優惠叫第二份牛就有半價，我哋兩個人就分別叫咗吉列牛同埋封門柳！咁佢本身跟餐仲會送麵豉湯同埋飯，我哋其中一個呢就轉左要烏冬唔要飯，不過就要加$15。味道方面，封門柳個牛味十分之濃郁，而且最好係佢板燒塊板夠熱。好多時喺出面食板燒牛肉，佢塊板本身唔夠熱嘅話好難可以煎到塊牛肉外脆內軟嘅效果，變相令到塊牛肉幾好味都冇用。吉列牛炸皮都做得好脆，坊間有啲吉列牛個渣皮都未必做到呢種效果。佢跟餐仲會有一碟牛肉汁，我就覺得封門枊唔係好適合再點汁，因為依個部位本身牛味都比較濃郁，再點汁就可能搶左陣牛味。相反吉列牛就好適合，因為佢牛肉本身唔係話好濃味，但係牛肉嘅質感比較冧。以佢嘅白飯上面亦都加咗啲飯素，出面嘅日本餐廳都未必食到。 整體來講，依間餐廳性價比十分高。再加上佢而家做緊第2份牛肉有半價優惠就更加抵食。佢除咗有板燒牛肉食之外，餐牌仲有其他唔同丼，期待下一次再去試吓！