果子｜海南雞飯·喇沙摻摻 (啟昌樓) (已結業)

今日同朋友黎到哩間果子 Cafe食晚餐，叫左兩個晚市套餐，海鮮喇沙摻摻$68 配熱檸檬薏米水，同無骨海南雞飯（白飯）$64配熱檸水，套餐加$18可配小食，叫左白雲酸辣鳳爪（6件）同絲網春卷（2件）。額外仲叫左沙嗲雞肉串燒（2串）$25。海鮮喇沙摻摻，當中的摻摻係馬來西亞用語，有「兩溝」的意思，指油麵混合米粉的一種粉麵，油麵有口感但係唔吸湯汁，加埋米粉吸收湯底精華，口感、味道可以同時滿足。哩個摻摻賣相唔錯，用料十足，湯底蝦味同椰汁味濃，非常好食！無骨海南雞飯（白飯），奉送有雞湯，雞肉嫩滑，配有薑茸、辣椒醬、甜醬，雞肉沾醬一齊食，非常下飯，醬汁雖然係配角，但係缺一不可！至於小食方面，酸辣鳳爪，鳳爪無骨，醬汁酸辣開胃，非常好食，最後仲追加一份！絲網春卷夠有特色，外有網紋脆皮，內有芋頭等製成嘅餡料，但始終係油炸品，食得多會膩，都係一件起兩件止。沙嗲雞肉串燒的沙嗲醬甜而不辣，內有碎花生增添口感，配埋燒雞肉好好食。呢間餐廳晚市套餐價錢平民化，而且唔收加一，套餐加小食都唔過$100，而且呢度環境乾淨企理舒適，適合朋友聚餐。