家後2.0

營業中

休息中

慕名黎到呢間深水埗區著名食巴斯克芝士蛋糕嘅水餃店舖。之前睇YouTube MM介紹老闆係日本嘅人妻，一直都見佢要排隊，今日終於能夠抽空去食。舖頭裝修舒服，店內亦都有幾幅畫去寄賣，空間都算大唔會太迫。老闆娘好熱情同埋有禮貌，招呼周到，到最後仲會問啲嘢好唔好食同埋有咩需要改善。今日我哋叫咗一份雙拼水餃同埋一份雙拼煎餃水餃叫咗雲耳椰菜豬肉餃同埋韭菜餃 $42食得出冇乜點加味精，唔會太鹹，感受多咗食材本身嘅鮮味。特別想推介手工煎餃裏面嘅小籠包豬肉餃，咬落去會好似小籠包咁樣爆汁，外皮煎得香脆，唔錯👍 另外都叫咗個芫荽豬肉餃，啱晒芫荽控 我哋擔心唔夠飽，嗌多咗個咖喱牛筋腩飯$48，咖喱係港式咖喱唔係日式甜咖喱。然後我哋亦都叫咗個日式住家飯團，合味道都非常特別。用保鮮紙包住飯團，方便揸住嚟食。 飯粒軟腍，配埋一啲日式嘅醃菜唔錯。最後去到最需要隆重推介嘅芝士蛋糕。之前喺網上面見好多人嚟到都食唔到，因為好快賣晒。今日食到佢嘅原味同埋咖啡味芝士蛋糕。好香濃嘅芝士味，亦都唔會過甜，配合微焦香嘅蛋糕面，可以話食極唔濟。唯一可以講嘅就係希望個蛋糕可以蛋嗰啲，因為真係好好食。