華輝小食 (已搬遷) 新店位置

嗰日同一班朋友去大圍踩單車，想食少少野就話俾我上網搵到呢一間😻又有得食手撕雞又有得食腸粉絕對係我嘅大愛！雖然Google上嘅地理位置複雜，但係只要根據Google Maps，連路痴都可以行到過去🤤一去到就發現有好多花牌，原來只係啱啱開張無耐🤭但已經好多人要喺門口度等15分鐘先可以自行入去搵位坐🙆🏻‍♀️坐低咗之後要出去先叫餐，再自行取餐！我哋嗰日叫咗個手撕雞撈麵加底同一個手撕雞腸粉。等咗大約10分鐘就有啦，之後店主同我哋講撈麵餐有跟嘢飲，可以自己去雪櫃度揀。食完之後覺得手撕雞口感十分嫩滑，調味汁搭配啱啱好，唔會過鹹或者過淡。至於撈麵係正宗嘅印尼撈麵，可以自行選擇辣定唔辣，而店主亦會因應你嘅選擇而決定辣醬落嘅程度。腸粉方面亦都莫名其妙地配，仲有搭配埋甜醬和麻醬，但一啲都唔會覺得口感奇怪。