好運泰國美食

營業中

休息中

餐廳位於新蒲崗商場，係你我身邊都有一個，補習社小食舖餐廳林立嘅街坊商場。搭扶手電梯上到去，第一下搵唔到間舖頭，兜咗個圈。近向下嘅扶手電梯，門口有個大魚缸嘅就係啦。原來舖頭一半係泰國菜，一半係日本菜，直程可以日式餃子配泰式奶茶，不過今日嘅Mood係想食泰國菜。嗌完食物之後，好快就上到菜。小食要左炭燒豬頸肉，份量都幾多。汁有少少似泰式酸辣醬加羅漢子醬，偏酸食到尾後勁都少少辣，不過唔點汁本身都好夠味，調味夠，有蒜香味。食泰國野一定會叫炒通菜架啦，要左個泰式炒通菜。份量都幾多下，啱啱炒起熱辣辣，但唔會炒到老哂，保留到菜嘅脆口。唔係好食得辣嘅都唔怕，辣度都有得揀，叫咗BB辣。啱啱好嘅辣，配上咸香嘅豆醬味，好惹味。香葉辣椒肉碎炒飯，都係揀咗BB辣。大概1.5碗嘅份量，呢個價錢嚟講好少地方做到了，更唔使講係泰國菜。肉碎、豆角粒、香葉加埋，增加左口感。泰式炒飯係偏濕身嘅，但都好有鑊氣。芒果糯米飯，有六個小糯米球，配上芒果，賣相好靚。糯米飯食落原來係熱嘅，椰汁都係有落鹽嗰種，夠正宗。芒果甜甜地配埋一口一件嘅糯米飯，為呢餐畫上完美句號。