拼食三郎 (已結業)

食左一段時間，今日先記得打返。拼命三郎係新蒲崗廣場一個小舖，位唔多坐得好逼，因為太少位等超過半個鐘係minimum charge。一入到去坐係門口最近張枱，因為我地得2個人所以要搭枱，成間舖得2個負責人，樓面果個女仔都唔係好夠位行，再托住d雞煲真係好牙煙，黎食真係要預左小心d。不過咁無損我對芝士雞煲既熱誠，我就叫左個雙重芝士雞煲，朋友就叫左個芝士龍蝦湯雞煲。講下我個雙重芝士雞煲先，濃濃既芝士湯底再外架面頭既大量芝士碎，滾之前千祈唔好攪佢，要等d芝士碎溶係d雞件上面，咁夾起就有拉絲架啦！雞件本身已經熟架啦，我個煲雞脾肉多，夠晒滑，除左雞件，個煲仲有菜，粟米，金菇，豆腐呢d大路野，唔夠仲可以另外再點。朋友既芝士龍蝦湯飲落唔算重芝士味，可能比龍蝦湯d味蓋過晒，不過單純當龍蝦湯都幾好飲。食晒d配料當然要叫個出前一丁作結啦！d出前一丁索晒剩低既芝士湯，如果再想稠d既可以再加金叫多d芝士，咁就直頭係芝士撈丁啦！