Project B (已結業)

太子行去深水埗方向，中途見到依間酒吧餐廳。環境幾開揚有落地玻璃，地方闊落樓底高，唔會好應聲，坐得舒服，而美食選擇唔少，價錢經濟。香草忌廉紐西蘭青口 $98紐西蘭青口一盤十多隻，青口大隻肥大肉厚，味道鮮甜嫩滑，青口貝的足絲清得好乾淨，可以大啖放心食。醬汁以白酒煮忌廉味道香濃，好掛汁非常美味。墨西哥焗雞肉卷 $48餅皮煙韌有嚼口，餡料有雞肉、芝士、洋蔥和黑橄欖，加上了酸酸辣辣的莎莎醬、牛油果醬和沙律醬，味道豐富口感有層次，小食好味充滿墨西哥風味，必食推介。蜜糖黑椒雞中翼 $62雞皮炸得微脆，肉質嫩滑有肉汁，氣炸的唔油膩，沾有黑椒蜜糖，惹味香口好食。黑松露帶子天使麵 $108帶子厚肉好大粒，煎香了表面，肉質彈牙鮮甜。天使麵份量好多食完堅飽，有菇、三色椒、洋蔥增加不少口感，加上香濃的黑松露醬撈麵食，都ＯＫ唔會好油。自家製窩夫拼鮮果雪糕 $88香噴噴的熱窩夫充滿蛋香，口感外脆內軟，淋了朱古力醬味道甜美，配上忌廉和海鹽雪糕，甜中帶咸清新口味，冷熱交融啖啖滿足。