意樂餐廳 (禾輋廣場) (已結業)

星期日既午餐選擇左係沙田禾輋既「意樂」到食，貪佢夠平靚正，又唔洗等位。每個餐都有主菜，另外再有一杯飲品或者一個湯。如果叫蕃茄湯天使麵既話仲會有蒜香牛油多士添。原茄意大利菜湯: 蕃茄味超濃，上菜時仲係熱辣辣，好好味。蒜香牛油多士: 多士好脆好有蒜香牛油味，濃度適中。意大利特濃蕃茄湯天使麵: 天使麵可以揀配兩個餸，我地揀左蛋同埋野菌，湯底同埋菜名有點兒出入，味道比較淡，一D都唔濃，而且比較稀身，水旺旺，無咩蕃茄味，下次唔會叫。米蘭原茄烤豬扒焗珍珠飯: 豬扒飯用既係珍珠米，食起上黎幾煙韌，豬扒仲係原塊上，口感都算軟熟，上面淋左好多蕃茄醬，食落似係用左好多茄膏調味，味道唔會太酸，可惜上面淋左過多芝士，唔好芝士既我唔記得叫佢走芝士，下次會記住架啦。百里香烤雞菌皇扁意粉: 賣相唔錯，烤雞係用雞胸肉，醬汁既味道有D似忌廉湯，配埋意粉，百里香同野菌一齊食都幾夾，整體味道都幾好。整體黎講，呢到既食物以呢個價錢黎講真係算唔錯，仲要可以坐低有人SERVE，除了蕃茄湯天使麵有大量改進空間之外，樣樣野食都幾OK，得閒都要黎多D。