越味皇 (已結業)

同老婆去完越南之後幾個月，都想搵間越南餐廳食返次回味下。今日我地出開荃灣，行到路德圍搵食既時候見到呢間越南鋪，見野食都唔錯所以就入去了。天花滿掛越南特色既竹笠。龍眼冰，甜得黎幾清，一啲都唔漏，最後連龍眼肉食埋成杯清哂。牛油果沙冰，好香濃既牛油果味，仲有少量果肉增加沙冰既口感。而且本身牛油果係無甜味，所以餐廳加上適量既蘋果一齊整，令到成杯都好fresh！香燒迷你庶蝦，其實都唔迷你，好大舊蝦膠拎去炸，好彈牙有咬口。牛油蒜蓉雞翼，面有一層薄薄既炸粉包住非常香脆，再加上蒜蓉喺面調味，外脆內軟，好邪惡呀！牛油果軟殼蟹米紙卷，軟殼蟹包住再隔左陣先食都仲係好脆，加上牛油果同米粉一齊一啲都唔覺熱氣。越式串燒，雞串燒完唔乾，牛串好嫩滑，而且加左啲香矛令到牛肉更加好味，沙爹醬香得黎一啲都唔辣。越式燒雞，雞好嫩滑，調味唔會太濃，只是稍為油了點。香蒜牛油焗青口，超香牛油味，蒜味唔算大，青口唔韌幾厚肉。火車頭湯河，牛骨湯底好濃好甜，而且牛丸好彈牙好有牛肉味！