同聚

營業中

休息中

天氣突然轉凍，最啱食D熱辣辣又暖胃嘅胡椒豬肚雞煲😏 所以揀左位於上水石湖墟嘅一間新新地嘅餐廳。我地一行四人叫左半隻雞，另外再加兩個小菜同一個炒麵，真係飽到上心口!!😆胡椒豬肚雞煲 $198本身仲諗住可以暖下胃，點知原來係酸菜豬肚雞煲😮，胡椒味勁弱…😂豬肚份量唔算少，亦無怪味，雞件份量可以接受。另跟唐生菜，望落都新鮮。蜜椒雞中翼 $78新鮮熱辣炸出嚟，雞翼大大隻，而且有八隻咁多😯，平均唔駛$10/隻。雞翼炸到幾脆，肉質幾滑，但黑椒味偏淡，而且仲有少少雞腥味(我對雞腥比較敏感😅)。小炒王 $88每間餐廳嘅小炒王都各有不同，呢間就會加入魚仔，魷魚大大件、份量多。整體唔會好鹹，但有少少偏老嘅韭菜花。豉油皇炒麵 $52呢個有少少鑊氣，味道正常，勝在價錢唔貴，又包餐飲。京蔥爆牛肉 $88牛肉份量幾多，而且切得幾大塊，亦唔會好韌。整體小菜算大份、唔會煮到好鹹、而且價錢又唔貴，無加一之餘，每個小菜滿$68就會跟一個飯同熱飲，飲品大杯，唔Hea，缺點係白飯質素唔好，無飯香又唔好味。