譽小館 (已易手) 新餐廳

行完嘉道理農場睇梅花後，已經差唔多五點呀，還未食晏晝，睇見一間點心餐廳形式嘅酒樓，下午茶兩款點心共34蚊，便入去食。木魚燒茄子：新鮮滾熱辣，茄子上鋪滿鯪魚肉大大件，加上燒汁和木耳，味道恰到好處，正。吉品鮑魚燒賣成為$9.9,賣相味道都唔錯。燒賣比起出面酒樓大粒，還有大大粒蝦，還有一隻鮑魚。唔錯、唔錯。奶黃包：一般嘅奶黃包，冇乜特別，唔流心，有啲失望。煎堆仔：南瓜製作個外皮，新鮮炸起，外脆內暖，中間有啲芋頭蓉，好好味。津白鯪魚球，鯪魚肉中有果皮，又大粒鯪魚球，比起其他酒樓好味。鮮蝦菜苗餃，蝦大大粒又爽口，好味。最後一碟，椰汁馬豆糕。味甜恰到好處，唔係超甜。椰汁味重，係好味嘅。總括嚟講，甜心真係即叫即蒸，新鮮熱辣好味道。環境乾淨，坐得舒服。超抵嘅下午茶，一定要試。