影片
更多
2011-10-09
11 瀏覽
雖然响灣仔返工，但當日咁啱同同事 V 都响九龍區上完庭後差唔多食 lunch 時間，所以兩個人膽粗粗咁約埋「半蛇王」咁去食早 lunch。同事 V之前話呢間嘢新開食物唔錯，於是就落咗尖沙咀到食 lunch。環境 & 服務去到...真係窒咗窒 - 門面好 grand 好靚，雖然當時應係食 lunch 嘅高峰期，但入面人唔多，心諗肯定係貴嘢，但同事 V 拍心口話唔貴...OK..照入。一入門，幾個近門口嘅待應即時望住咁話歡迎呀、幾多位呀，反應好快。坐底後，待應即時沖茶＞ 放底點心紙（餐牌？）＞ 介紹有咩餐 & 有咩推介食物後，即刻行開比時間你諗食咩，唔會企响到係咁迫你落 order，印象分即時大加~可能裝修得好 grand，所以食客講嘢時都細聲 d，又有好柔和嘅 background music，絕對唔會好似出面食肆咁，嘈到爆。眼見都有唔少食客係情侶 & 疑似「上等人」。感覺好舒服。餐牌嘛...可能新開舖，所以只有一張紙咁比你 tick 食咩。但入面有成三十幾四十樣食物，冇相真係有 d 難揀食咩。都算有心嘅係 - 有 mark 星星果 d = 推介食物。第一次食，當然係穏陣咁食有 mark
環境 & 服務
去到...真係窒咗窒 - 門面好 grand 好靚，雖然當時應係食 lunch 嘅高峰期，但入面人唔多，心諗肯定係貴嘢，但同事 V 拍心口話唔貴...OK..照入。一入門，幾個近門口嘅待應即時望住咁話歡迎呀、幾多位呀，反應好快。
坐底後，待應即時沖茶＞ 放底點心紙（餐牌？）＞ 介紹有咩餐 & 有咩推介食物後，即刻行開比時間你諗食咩，唔會企响到係咁迫你落 order，印象分即時大加~
可能裝修得好 grand，所以食客講嘢時都細聲 d，又有好柔和嘅 background music，絕對唔會好似出面食肆咁，嘈到爆。眼見都有唔少食客係情侶 & 疑似「上等人」。感覺好舒服。
餐牌嘛...可能新開舖，所以只有一張紙咁比你 tick 食咩。但入面有成三十幾四十樣食物，冇相真係有 d 難揀食咩。都算有心嘅係 - 有 mark 星星果 d = 推介食物。第一次食，當然係穏陣咁食有 mark 星星果 d 先啦...再睇食物價錢，見係相當相宜...ok..即喪叫嘢食 (￣+▽￣)
食物
茶
估唔到佢地係用玄米茶，仲要幾濃果隻，即時心情大好。食到咁上下，佢地會幫你拎走壺茶去加熱水，唔似其他同類食肆咁一係你唔叫佢地永遠唔會理你壺茶 or 只係過黎睇吓你仲有冇茶就算。超感動 :_)
墨西哥叉燒包 size 唔大，個皮好軟...好似餐包咁軟，一咬，認真要小心燙口，我估係即叫即焗，唔似係焗咗一大堆，有人 order 時先响焗爐拎比你 - 因為一 D 都唔硬。估唔到嘅係你真係會見到一粒粒唔細嘅叉燒，而唔係好似有 d 食肆咁比叉燒醬你就算..唔錯...唔錯。
三文魚長春卷响澳門永利軒食過頪似嘅，見到香港竟然有，即叫。一入口真係差 d 淥親，因為真係好脆好熱。咬開，同墨西哥叉燒包一樣，見到有大大粒三文魚!! 好食過永利軒好多! 食咗一條唔點跟住黎嘅醬已覺好味，食第二條時點佢個疑似芝麻醬，仲好味! 最後，我自己一個唔理同事 V，食哂三條..（認真唔好意思喲）
糯米雞恕我孤陋寡聞...黎到後我問佢呢個係咩... 囧rz... 呢個糯米雞同我地食嘅用葉包住嘅好唔同，佢用蛋夾住 D 糯米。由於唔似一般嘅糯米雞咪濕立立 & 油冧冧，食完唔覺漏。可以試試~
豬潤腸唔知係咪要整豬潤嘅事前工夫麻煩，所以好多食肆都唔會有呢個菜式。個腸粉皮好薄好滑，豬潤一 d 都唔腥，證明事前嘅程序做到好足。佢地仲好有心咁將豬潤切得細細粒之餘唔會堆埋一邊。Total 有三條，三條 d 豬潤份量都分佈平均。所以雖然皮薄，但夾起黎唔會跌埋一邊。如果可以，下次我會托待應將豉油分開上 - 我自己食腸粉只係落好少豉油。但同事 V 話正，因為佢地真係落好多甜豉油，啱佢喎~
薯絲豬頸肉平平無奇嘅豬頸肉，但當你食埋伴碟果 D 薯絲嘅話就變得相當好食。豬頸肉本身食多兩舊會覺得好膩，仲要係好熱嘅豬頸肉。但同凍冰冰、酸咪咪而又好爽口嘅薯絲一齊食（or 輪住食），即時冇哂肥膩感。一個又熱又腍，一個又凍又爽口，一拍埋，成碟嘢好大對比，變得好好食。當時有個衝動想叫待應問廚房 D 薯絲係點整。
食完，埋單 around 百鬆 D...平過飲茶。總括黎講，樣樣都好好食。由於成張點心紙有成三十幾四十樣嘢，加上食物水準高（又價錢相宜呢~），好難唔返轉頭食。下次會試冰鎮奶茶（見到好大杯）+ 蝦餃（隔離枱情侶話粒蝦好爽好大粒）+ 牛肉燒賣 & 桂花糕（另一張枱師奶甲話有燒賣杞子..唔乾身好「牛」，師奶乙話桂花糕好清，唔太甜）+ 炸雞翼（另一張枱個妹妹仔話好味道喎）。希望到時有本有埋圖嘅餐牌睇吓，可以比我容易 D 揀嘢食~其實食到大約 1:40 p.m .時，開始好多人入黎。到 2:00 p.m. 全場已爆。原來尖沙咀食 lunch 時間同中環金鐘灣仔好唔同... *O*
張貼
