漢記小廚 (已結業)

去完朋友屋企，經過啟業邨大排檔，決定同朋友一齊去食返餐，因為已經好耐冇見到呢一類型懷舊嘅大排檔冬菇亭。去到姐姐已經好熱情咁樣招呼我哋，又開大個冷風機吹住我哋，仲要係我哋未點任何嘢食之前，已經過嚟幫我哋洗碗碟，同埋送咗一兜豬紅俾我哋食。最後我哋叫咗一個炸蠔餅，一碟豉椒炒蜆，一個紅燒豆腐煲，一碟西檸雞，兩杯凍檸茶，一支啤酒，埋單都係講緊大概$400，我哋一行三個人，平均每個人都係百零蚊左右，食物質素更加唔使講，係典型大排檔風味，特別推介炸蠔餅！勁大份勁有鑊氣點埋魚露黎食10分香口，蠔肉仲要大大粒！其他果幾味小炒一啲都唔失禮，所有嘢都好好味， 10分值得推介！