北海道食堂 (已結業)

呢排心情唔多好，今日放假，老公帶我出去shopping 兼撐枱腳散心早兩個月經過呢道，老公已經話想食呢間北海道食堂，不過嗰次太多人排隊，所以放棄咗。今晚ok喎，等3張枱，10分鐘左右就有得入啦。佢個menu望落好豐富， 基本的日式飯、刺身、 shabu shabu 、串燒、壽司、沙律、小食、牛扒都有幾種可以揀 我哋點咗呢期推介嘅足量三文魚子爆丼 ( 有松葉蟹肉同吞拿魚蓉)呢個飯真係超級驚喜呀 店員拎碗飯上枱嘅時候係一碗白飯上面鋪咗一舊吞拿魚蓉 mix 松葉蟹肉，跟住，佢打開個木桶，一殼一殼一殼魚籽畢落去碗飯度， 足足3大殼，超勁滿足，真係見到都興奮，未食都已經滿 食落口都唔講得笑，啲魚仔好新鮮，喺個口度一粒粒咁爆，好鮮甜，正 吞拿魚蓉同埋長腳蟹肉好夾，成個飯都好好味 另一樣叫咗嘅係和牛味噌雜菜煮定食。個份量一樣係唔講得笑，$108 抵到爛。超大份和牛shabu shabu，個底有椰菜、芽菜、甘筍。最緊要係個蒸蛋，好食到冇朋友，又香甜又滑。叫咗兩個飯，所以我哋揀一個沙律做前菜。見到 MENU 有海葡萄，當然唔會錯過喇，我哋就點咗個海葡萄豆腐野菜沙律。OK，清清地，$40 份量啱啱好夠兩個