南記飯店 (已結業)

打冷野都係平常可以食到既，只是咸雞就唔係咁多地方有供應，樣子好似白切雞咁，多了一份咸香，雞肉唔太嫩滑，不過就好有鮮味。鵝片好嫩滑，鹵水味十足，有一定年月，整體唔錯。條魚飯就好多黃油，好美味，魚味鮮味並存，如果可以再大條d就好開心。墨魚拼大腸就好夠味道，而且我鍾意墨魚既顏色，絕對無上橙色，大家都知道啦，出面十間有九間都上了橙色，呢d色素始終對健康都係無益架嘛。接下來，有個值得推介既湯，蕃茄紅衫魚湯，但係呢個湯都唔明點解會係潮州野到出現，仲要係熱賣食品，唔通佢係潮州人所創出黎，不過佢地煮得真係好好飲，鮮茄味香濃，魚味出眾。蠔餅就唔係太好食，唔鬆脆，好似蛋餅咁，蠔仔份量都唔多。蟹棗同蝦棗都做得幾好，炸得唔會太燶，配上桔油同吃，更加滋味。豉椒聖子好夠味，炒得好好，夠哂火喉，唔會靱。個沙嗲牛肉芥蘭亦都好夠味，沙嗲味又唔會遮蓋左牛肉味同芥蘭配合得天衣無縫。潮式炒麵線好好味，不過太多油。水瓜肉碎煮魚鰾真係好好味，我一個人差不多食哂成碟。最後梗要食番個蠔仔粥黎完結啦，蠔仔數量多，湯底鮮味十足，整體都唔錯。南記既份量好大，價錢公正，食到好飽，不過環境就好一般，唔好期望D人好斯文，同好好服務。