極品靚鍋 (已結業)

今日同老豆黎到呢間火鍋店食翻餐勁既。 我地黎得早，5點左右就到。鍾意呢間夠闊落，樓底又高，打邊爐果陣都唔怕全場煙霧瀰漫。我地揀咗海底耶竹絲雞湯底。 坐底之後我先叫牛、羊、豬各2碟，再出去混個醬。 翻到黎已經有肉到，有效率。 呢3類肉都係薄切，放落鍋度10-20秒即起可以食得。 老豆大讚豬肉鮮甜，我就最鍾意羊肉。熟食我都有叫，麻醬秋葵幾好食，豬耳略硬，鳳爪就正正常常啦。 下一波就叫左啲海鮮，有扇貝，蜆，青口。 扇貝好食，我忍唔住再加多輪添。 魚滑堅出色，彈牙，爽口。試埋花膠，適合淥耐少少會更好。鴨血就正常，滑但味道較淡，豬潤亦不錯。